O le mae’a faalauiloa ai o le lipoti lona fā o loo faailoa ai tulaga o loo iai le siosiomaga o le atunuu, ma ona alaga’oa faalenatura, ua taoto mai ai ni lu’itau i nisi galuega e saga tapu’e atili ai le malupuipuia o o tatou fanua ma eleele, o meaola o le natura o loo ola ai, o tatou vaitafe ma vaitūloto, faapea le siosiomaga o le gataifale i le sami ma meaola o iai.
Ua faailoa i se pepa o faamatalaga, o le lipoti o le tausaga 2023 ua faalauiloa nei, o loo faailoa ai vaega tāua e ao ona faaleleia ai lo tatou siosiomaga, ae e iai foi ma vaega ua matuā faaletonu.
O le faaleagaina o le ozone, o suiga o le tau, ma kasa oona o loo āfaina ai lo tatou lalolagi o nisi ia o vaaiga taula’i o loo fautuaina e tatau ona faatāua i fuafuaga o polokalame e taofia ai le faaleagaina o le tatou siosiomaga.
O lea lipoti na faalauiloa faatasi ma le fuafuaga alualu mamao a le matagaluega o puna’oa faalenatura ma le siosiomaga e avea ma ta’iala o ana galuega faatino mo le tausaga 2023 i le 2027.
