O ni masina e le’i mamao atu sa tulai mai ai ni gaioiga faatupu vevesi i totonu o le lotoā o le malaevaalele i Faleolo e pei o le vaega o loo tutū pe paka ai taavale.
O ia gaioiga e pei ona faailoa lautele e le Ofisa Sili o pulega o malaevaalele le susuga Tumanuvao Evile Falefatu, ua lamatia ai le puipuiga o le saogalemu o tagata lautele ma meatotino a le malo, auā sa umia ai ni a’upega e pei o se agaese o se sapelu, ma se laaumalosi na faapāpā.
Ua faailoa lea tulaga e le faauluuluga o le pulega o malaevaalele e avea ma mafua’aga o le faai’uga e siaki uma taavale e afea le malaevaalele faavaomalo i Faleolo, lea ua faamuta e lē o toe faia.
Ua faailoa ai e Tumanuvao Evile Falefatu sa iai nisi tulaga na tula’i mai i le faia o lea galuega ua sopoloa ai le faatinoga o le tiute a le vaega o le puipuiga o le malaevaalele ma ua faamaualalo ai i le atunuu aemaise i latou na aafia ai.
Ua faailoa foi e le faauluuluga o loo manino i le tulafono o pulega o malaevaalele a Samoa o le tausaga e 2012 le iai o le malosi’aga o le pulega e faatino ai o latou tiute ina ia malupuipuia le saogalemu pe a iai ni mea e tutupu e lamatia ai le puipuiga o tagata ma meatotino.
O le taimi nei o loo toe iloilo itu i fesoota’iga ma tiute faatino poo protocols a le pulega o malaevaalele a Samoa.
