O lea ua faamatuu e leoleo ia faasalalauina i luga o televise ma upega tafailagi le ata o le alii o loo feta’ua’ina e fealuai solo ma faamata’u tagata o loo i totonu o taavale i se naifi tulou, ma o lana gaioiga lea na faia i Aukilani i le vaiaso talu ai.
Fai mai Satini sinia o Nick Polland sa faia suesuega a leoleo i le mataupu lea e aofia ai se gaoiga na tupu i le Aso Lulu talu ai e faapea na agai ane ai le tagata lea i se taavale sa faapaka i le kapaka a le malae voli i Mairangi Bay ma ia faafefe tagata sa iai totonu o le taavale e faaaoga ai lea auupega ma iu ina lavea ai se tasi sa i totonu o le taavale a o taumafai e agai ese.
E lei maua le alii lea i lea aso ae sa faia pea suesuega a leoleo ma ua faamatuu mai ai nei la ma lona ata e fesoasoani ai i le suesuega pe afai e iai nisi e silafia ma logoina ai leoleo.
Afai e te silafia ni faamatalaga valaau i le laina a leoleo i le 105 poo le vili sa’o o le crimestoppers.
