O feoa’iga uma i taavale e aofia ai taxi poo taavale laiti ma pasi la’upasese i totonu o le taulaga i Apia, o le a tūtūaai ai le galuega a leoleo i le taimi atoa o le Fono a Malo o le Taupulega, e amata atu i le vaiaso nei e oo i le aso 28 o Oketopa.

Ua amata i le Aso Gafua o lenei vaiaso fou ona tapunia le nofoaga faatali pasi i Savalalo ae see uma i le nofoaga faatali pasi i le maketi i Fugalei.

O lea suiga e mae’a i le Aso Gafua 28 o Oketopa.

O lona uiga e faato’ā tatala le nofoaga faatali pasi i Savalalo i le Aso Lua 29 o Oketopa. I le fuafuaga e tapunia nisi o auala i le taulaga ona o le Fono a Malo o le Taupulega o se tasi lea o tapenaga sa tele iai faitioga mai le atunuu aemaise o pisinisi ma galuega e i totonu o le li’o o le taulaga e uia ai ia alatetele.

O lea ua faailoa i se pepa o faasalalauga aso ma le umi o itula e tapunia ai ia auala i le taulaga.

E tolu aso o loo aofia i lea fuafuaga o le Aso Tofi 24 o Oketopa, Aso Faraile 25 ma le Aso Toonai 26 o Oketopa ma e lima itula le taimi umi o le a tapunia ai nisi o ia auala, ae o le tele lava o le 4, 3 ma le 2 itula.

O lea fuafuaga ua faia ona o le puipuiga ma le saogalemu aemaise o le vave faagasolo o taavale e feaveaiina ta’ita’i o malo ma usugafono i nofoaga o le a faagasolo ai tapenaga eseese o le Fono a Malo o le Taupulega.