O le toe foi atu o Samoa e tauva i le sa’ilia o se tausala o le atulaulau poo le Miss Universe i le lata i le 40 tausaga e le’i toe auai se tamaitai o le atunuu i lea tauvaga a le lalolagi, o se faailoga lea o le toe tausinio o Samoa i tauvaga tetele nei, e pei o le tauvaga o le sa’ilia o se tausala o le Kelope le Miss Global.
O le taumafaiga a le alo tamaitai o Samoa ia Haylani Pearl Kuruppu i le sa’iliga o se tausala o le atulaulau e ui e le’i sao atu i le 30 na faia iai le filifiliga mulimuli ae ua momoli le faafetai a Haylani i le tapua’iga a Samoa aoao, i soo se tafa o le lalolagi aemaise o le tapua’iga a lo tatou atunuu i Samoa.
O lea tausala o le atunuu sa manumalo i le pale o le Tausala Samoa i le setete o Vitoria i Ausetalia ma tausinio i le sa’iliga o se Tausala o Samoa ma manumalo ai.
E lua tausaga o ia tauave lea pale se’ia oo ina tauva i le sa’ilia o se Tausala o le Kelope le Miss Global ma ia ausia ai le tulaga lua le first runner up.
O le kamupani telefoni o le Vodafone Samoa o le lagolago autū lea mo tapenaga a Haylani i le sa’iliga o se Tausala o le atulaulau, e pei ona sa filifilia e fai ma sui o Samoa ina ua mae’a ona faapaleina e avea ma Tausala o le Miss Samoa Universe i le masina o Setema o le tausaga nei.
