Ua usuia nei le fonotaga a le Intergovenmenral Negotiating Committee poo le komiti o loo nafa ma le faafoeina o gaioiga ma faatinoga e foia ai faafitauli e pei o le faaaogāina pea o plastic poo pepa uga.
I le fonotaga lenei i Kenya o loo taimua ai Samoa i le unaia pea o le leo o atumotu laiti e 39 e pei ona Taitaifono ai i lenei faalapotopotoga.
Na faailo ai nisi o vaega e aafia ai le soifua manuia o tagatanuu o atumotu laiti i le faaaogāina pea o pepa uga poo lapisi ina ia mafai ai ona faatino loa se feagaiga e taofia ai lenei faafitauli.
Faailoa e Anama Solofa o le Taitai o le Alliance of Small Island States (A.O.S.I.S.) i vaega o ogasami o loo faatupulaia pea molimau e uiga i lenei faafitauli.
“O le gaosia pea o pepa uga nei o loo avea ma lapisi i le siosiomaga ma ua tele faamaumauga e faamaonia ai le maua o microplastics i totonu o tatou tino ma meaai o se aafiaga tele lea i le soifua maloloina o tagata.
“O se aafiaga foi lea i manu ma meaola o loo ola i le siosiomaga ma o le avanoa lea e faamanatu atu ai o loo faatino galuega a atumotu laiti e tusa ai o le naunautaiga ia foia vave lenei faafitauli.”
O loo faagasolo lenei fonotaga mo lenei vaiaso i le sini autu ina ia mae’a lenei fonotaga ua mautu le faatinoina ai o se feagaiga mo le puipuia saogalemu o siosiomaga aemaise o ogasami.
