Ua faamaonia o le a faaauau lava ona faia e Niu Sila le peimeni ta’i tausaga e tasi le miliona i le ofisa o Malo Aufaatasi le United Nations Relief and Works Agency le UNRWA.
Ua faia lea faaiuga i le mae’a o se taimi sa mata’itū ai e Niu Sila galuega a lea ofisa i totonu o Gaza auā o le aiaiga lea sa faailoa i le taimi talu ai ona o tuua’iga e faapea e to’a 12 le aufaigaluega a le ofisa lea e iai sootaga i le Hamas ma le osofaiga sa faia i le aso 7 o Oketopa i le tausaga talu ai lea na mafua ai le vevei i Gaza.
O se faamatalaga la a le minisita o le va i fafo a Niu Sila i le asō i luga o le upega tafailagi o le X ua ta’ua ai o le a faia lava le peimeni lea e Niu Sila i le mae’a o le silasila toto’a i le mataupu ma le tali ane mai Malo Aufaatasi i le mae’a o suesuega sa faatino.
E fā vaega o le foai a Niu Sila i tulaga ia o fesoasoani mo tagata e aafia soifua ma manaomia le fesoasoani i le taimi o vevesi, humanitarian crisis ma a aofai ai le fesoasoani e 17 miliona, o le peimeni mulimuli lea o ia fesoasoani i totonu o le tolu tausaga o lea maliega.
O isi atunuu sa taofia foi a latou peimeni ona o le mafuaaga lava lea e aofia ai Amerika, UK ma Ausetalia, ua toe tuuina ane foi la peimeni a Amerika ma Ausetalia.
Puna o Faamatalaga: https://www.1news.co.nz/2024/06/07/nz-to-make-unrwa-payment-on-schedule-and-in-coming-days-peters
