O le asō ua faaauau ai sailiga a leoleo mo le tina o le pepe lea na maua ua tia’i na o ia i se fale i le itu i Sisifo o Sini.
O le faamatalaga a leoleo o loo iai o latou popolega mo le tina o le pepe lea faato’ā fanau i le Aso Faraile na tea nei ma ua valaau nei mo le fesoasoani tagata lautele i lenei mataupu.
O le pepe teine faatoa fanau na maua atu i tuafale o se fale i Girra Rd i Blacktown poo le ‘afa o le lua i le aoauli o le Aso Faraile talu ai, na maua ina ua faalogoina atu e se tasi o le aiga lea lana tagi ane ma e talitonuina e maua pe faatoa tasi i le tolu itula talu ona ola le pepe ma o loo manuia.
O le taimi nei o loo vaaia le pepe e le maota gasegase i Blacktown lea na ave atu iai ina ua mae’a siaki a paramedics.
E tasi le tulaga ua mautinoa e pei ona faailoa e leoleo, o le pepe e lei fanau i se falemai ma e leiloa e leoleo e oo mai i le taimi nei poo ai le tina o le pepe ae o loo iai foi lo latou popolega i lona soifua maloloina.
Ua valaau ai leoleo i lea tina ina ia agai ane i le ofisa ma e fia fesoasoani mo ia.
O loo iai ata a le CCTV o loo maua ai se taavale o agai atu i le tulimanu o le alatele lea e iai le fale na maua atu ai i tua le pepe, o loo piki ane ai se tagata i le taavale lea peitai e le o iloa atu i meapueata poo ai tonu lea tagata.
