E ese mai i itumalo faapalota uma, o le aai tele i Aukilani lea ua filifilia ai nei Wayne Brown poo le na tamomoe vavalalata mai ma Faanana Efeso Collins, e mau a e fiafia mau foi e na sau loa le tala ua malo Brown faamavae loa.

O Brown o se tasi e le fou i le tofiga, aua o lea sa pulenuu muamua i Far North ma e ui ua faamanuiaina ae na o le 10% o tagata palota agavaa Aukilani lea na tusi aao iai.

E ui o le faitauga muamua peitai e foliga mai e faigata ona toe iai se isi suiga ma Faanana, ona o le 54,000 palota e va ai.

O Mr Fix it poo le igoa o loo iloa ai Brown, o lea lava na faagasolo ana faatosina ma le tala e tulai mai loa ona aveesea loa le toatele o le au fai tofi aofia ai ma le Auckland Transport faapea ai ma suiga o le toe faatulagana o pulega o loo i lalo o le Auckland Council.

I nai itula talu ona sau le faaiuga ua malo Brown na sau ai loa ma le faasilasilaga ua faamavae le faatonusili o le Auckland Transport Adrienne Young-Cooper.

O le taeao nei i le itula e 8 na saunoa ai Brown o le a amata faigaluega i le Auckland Council, ma o le a amata lava i le vaai o api a le council.

Ae mo Faanana poo le alo o le atunuu ua mamao ma maualuga lona tulai mai i lenei tamoega, o se malolo faatamalii a o ia lauga ai e faafetaia le lagolago aemaise o lona lototele i le agai i luma.