O se tasi o mataupu o tagi o le faigapalota na fofoga i luma o le faamasinoga i le asō Aso 7 o Iulai 2021 o le mataupu lea i le va o le sui filifilia o Anoamaa 2 Lauofo Fonotoe Nuafesili Pierre lauofo o le sui a le HRPP ma le sui na tagi le afioga ia Toomata Norah Leota o le sui o le FAST. O lea mataupu lea ua toe tolopo nei lona iloiloina ona o le iai o aafiaga o molimau.
Taua e le sooupu a le Radio Samoa ia Maina Vai , “ua afaina molimau i le omai lea o leisi itu ave ese faamalosi atu molimau ae o loo sauni e agai totonu o le potu faamasino”.
Taua e Maina na faaalia ai foi le lē fiafia o le alii loia na tulai mo Toomata Norah ia Alex Su’a i leoleo na galulue i le fale faamasino ina ua le faia le latou tiute o le puipuia o molimau. Peitai na tali leoleo sa iai i lea taimi e le’o se latou titue le vaaia o molimau.
Ina ua faafesootai atu i le matagaluega o leoleo mo se tali mai faatatau i lea mataupu poo gafea tonu e tū ai leoleo ae poo le a le latou tiute i le fale faamasino na tali le tamaitai Sui Komesina ia Papalii Monalisa Tiai Keti o le a faafesootai atu i le taitai o le vaega o loo galulue i le fale faamasino i le aso lenei.
O lea mataupu ua toe tolopo atu nei mo le aso a taeao aua lona faaauauina.
