A o mataitu ai nei e le auaunaga a le soifua maloloina le pipisi o le faamai misela i Amerika Samoa, e pei ona faailoa aiaiga o puipuiga o Samoa mai tagata e malaga mai le Teritori, ua faaalia e le Faatonu Sili o le soifua maloloina i Samoa Tutoatasi, ua iai nei le auaunaga a le matagaluega i falemai faaitumalo uma i le atunuu mo le faia o tuipuipui o le misela.
Ua faailoa foi e le Faatonu Sili, e ui ina faigata mafatiaga na tulai mai i le tausaga e 2019 ina ua pipisi foi lea faamai i Samoa, o le a lē tupu lea tulaga auā ua maualuga le numera o fanau i Samoa ua mae’a ona fai tuipuipui o le misela, e le pei o le tausaga e 2018 a o lumanai le tausaga na sosoo ai na aafia ai Samoa i lea faamai pipisi.
O le avanoa na feiloai ai tusitala ma le Faauluuluga o le soifua maloloina na fesiligia ai foi i se faamaninoga o faamaumauga o tagata ua maliliu i le faamai Koviti-19 i Samoa, ona ua iai le faaopoopoga o tagata e toalua lea ua faamauina ai le aofaiga e 31 o ē ua maliliu i lo tatou atunuu ona o lea faamai.
Le susuga Aiono Dr Alec Ekeroma o le Faatonu Sili Aoao o le matagaluega o le soifua maloloina.
