Ua faailoa ai i le auala o fesoota’iga a le taaloga siisii u’amea mamafa a Samoa le manumalo ai o le Pelesetene o lea taaloga i le atunuu i le palota na sa’ilia ai se Pelesetene o le faalapotopotoga o taaloga a Samoa ma le komiti o taaloga a le Olimipeka le SASNOC poo le Samoa Association of Sports and National Olympic Committee.
O le avea ai o Tuaopepe ma Pelesetene o le faalapotopotoga autū o taaloga a le atunuu o se isi lea o laasaga maualuga ua ia ausia i le atina’e o taaloga i Samoa auā o ia o se tasi o poutu toa o le taaloga siisii u’amea mamafa o se taaloga ua siitia maualuga ai le tulaga o le tatou atunuu i taaloga faavaomalo, aemaise taaloga o le Olimipeka.
Ua sui tulaga lea tamalii i le susuga Pauga Talalelei Pauga sa avea ma Pelesetene o le SASNOC.
E fā tausaga le umi o le nofoaiga mo le tofi Pelesetene o lea faalapotopotoga tau taaloga a Samoa.
