Ua i luma nei o le Palemia ma Minisita o le Kapeneta le talosaga tusitusia mai le Peresetene, o sui peresetene, peresetene lagolago, faamasino sinia ma faamasino o le Faamasinoga o Fanua ma Suafa, ua folasia ai so latou finagalo i le silasila ane lea o le Pulega Faatonu pe iai se finagalo e siitia o latou totogi, ma alauni.
O loo faatalosaga foi mo ni mea faigaluega e pei o masini computers laiti o laptops, fia maua o ni taavale lelei ma malolosi e alu ai asiasiga a faamasino i mataupu e suesueina, ia maua e faamasino faamanuiaga o telefoni e nao le Peresetene o loo ia maua, ma ia toe silasila i aso ma’i ma aso malolo poo livi mo faamasino uma.
O le tasi vaega o loo talosagaina o se failautusi e tua iai faamasino ia latou galuega i le itu i suesuega o mataupu, e pei ona maua lea auaunaga e faamasino o le faamasinoga sili, ae le o maua e faamasino o le faamasinoga o fanua ma suafa.
I le tusi talosaga lenei o loo faaalia ai, sa ave foi se talosaga faapea i le amataga o le paeaiga faapalemene lona 16 i le taimi o le faigamalo sa iai, peitai sa maua na o sina vaega itiiti i le siitaga o totogi.
I le itu i taavale o le isi lea vaega o loo talosagaina, ma ua faailoa ai e faamasino i le latou tusi i le Palemia ma le kapeneta, ua na o faamasino o le faamasinoga sili ma le faamasinoga faaitumalo o loo maua lea faamanuiaga i taavale ma le utuina o penisinisi, ae e le o maua e faamasino uma seia vagana le Peresetene o Faamasinoga o Fanua ma Suafa.
