Ua amata tatala i le asō le avanoa e faaulu ai suafa mo se isi taitai o le Green Party.
O le faamavae mai ai o le isi taitai o le Greens ananafi, James Shaw ua avanoa ai nei lona tofiga ma ua avanoa ai foi mo faigafilifiliga a le pati auā se isi taitai e galulue faatasi ma Marama Davidson.
I le faamavaega a Shaw ananafi na manino ai o laua finagalo ma Davidson e leai se sui laua te lagolagoina mo le toe palotaina o le tofi ma e tuu atu pea le faitalia i le sui e fia momo’e.
Ae i luga o le social media ma nisi o tusitusiga o le toatele o loo taumate ma lagolagoina le tamaitai faipule ia Chloe Swarbrick.
O le avanoa ua tatala i le asō e faaulu suafa o i latou e fia momo’e mo le isi tofi taitai o le pati a le Green, e tapunia i le aso 14 o Fepuari.
