O le faalauiloa ua faaulutalaina i le gagana Peretania o le “Let it end with me campaign”, e manatua ai le teineitiiti 15 tausaga o Sanarosa na fano lona ola ona o sauāga tau feusua’iga, ua amatalia e le vaega o tupulaga talavou a le Toomaga mo ē Puapuagatia, e ala i le momoli atu o tala’iga ma faalauiloa i totonu o aoga.
O le kolisi o Maluafou ma Sagato Iosefo na amata ai lea polokalame i le faamoemoe autū, ia savalia e sui o tupulaga talavou a le Toomaga le atunuu e faatalatalanoa ai le tāua o auala e taofia ai sauāga ma vevesi.
E pei ona silafia o ia kolisi ua amata ai le faalauiloa sa aafia talu ai nei i ni vevesi ma aafia ai se tama aoga i ni manu’a ona o se faaoolima e pei ona molia ai e leoleo ni tama a’oga e to’alima o le kolisi o Sagato Iosefo.
Faaalia e le Toomaga mo ē Puapuagatia, o le tāua o le amatalia o le faalauiloa i ia kolisi e lua i totonu o le taulaga, ona o se fe’au lea i faia’oga ma mātua, e tāua le ola aemaise o le galulue faatasi e tetee atu i le faia o sauāga auā e lepeti ai le nonofo filemu tainane le siosiomaga saogalemu o alo ma fanau o le atunuu.
O le ulua’i polokalame lea o le, “Let it end with me campaign” mo Sanarosa, a o lumana’i le Aso Faraile nei o le a faia ai se sauniga faapitoa mo lea alo tamaitai laitiiti o le atunuu na maliu laitiiti i le 15 o ona tausaga ona o sauāga.
