O le talosaga apili a Lema’i Faioso Sione ua toe lu’i ai le faaiuga ua faamaonia ai lona moliaga o le taupulepule e faaoo le maliu, ma le talosaga e faaulu atu ai ni ana molimau fou, o le a amata ai galuega a le faamasinoga o talosaga a le faamasinoga maualuga poo le faamasino apili, lea o le a faagasolo i le vaiaso nei.
O le mataupu foi o se apili faasaga i le faaiuga a le faamasinoga i le va o Faifua Tuimaunei ma leoleo o le a iloiloina i le Aso Gafua o lenei vaiaso lea o loo lu’i ai le faaiuga na faamaonia ai le moliaga solitulafono poo le criminal conviction.
O le Aso Tofi o le vaiaso nei e taualuga iai iloiloga a lea faamasinoga i le faaiuga a le faamasinoga maualuga na taofia ai le faamalolo lē tumau o le faipule o itumalo o Lepa ma Faleata 3.
O le Fofoga Fetalai o le Palemene o loo talosaga e toe iloilo lea faaiuga.
O le Aso Faraile nei ua faatulaga e aumai ai faaiuga a le faamasinoga o talosaga apili a le faamasinoga maualuga ma faamuta ai ana galuega mo lenei tausaga.
