O le ofoina o le malosi ma le taimi e faia ai se auaunaga mo nisi tagata e aunoa ma se taui, e lē faigofie mo le toatele o tatou auā o le galuega e maua ai le totogi e fesoasoani i le tele o isi atina’e.

O le faatūina o auaunaga tau faalapotopotoga i Samoa e tau amata ai ni galuega e fesoasoani ai i tagata e iai aafiaga tumau o le soifua, o le tina talavou o Faaolo Utumapu, o se tasi e iai aafiaga tumau i lona soifua, sa lotolotoi ai i le amataina o lea fesoasoani e aunoa ma se totogi.

O lona sao i le atina’e o le olaga a’oa’oina ma le ola taumafai o isi tagata e aunoa ma se taui, ua amanaia e le atunuu o Peretania tele, ma maua ai e Faaolo le faailoga taualoa a le Tupu Tamaitai sa Faaao iai Malo o le Taupulega.

O lea faailoga taualoa e ta’ua o le Point of Light Award ua amanaia ai le galuega a Faaolo ma ua faatāua ai foi le sao o auaunaga tuma’oti o loo faia i atunuu o le li’o o Malo o le Taupulega.

O le Aso Lulu ua mavae i se sauniga na tauaao ai lea faailoga taualoa e Faaolo Utumapu mai le sui o le Malo o Peretania i Samoa le Komesina Maualuga o David Ward.

Mo le silafia o Faaolo o se tamaitai ma se tina talavou e po le vaai na faauu mai le Iunivesite i Aukilani ma ona faailoga i tomai tau fesootaiga, ma o ia le uluai tusitala e iai aafiaga tumau o le soifua sa galue i leitio ma se fale televise i lo tatou atunuu ina ua mae’a ana a’oa’oga.