Ua fetaui le faailoga e Samoa o le aso faavaomalo o tina o le lalolagi i lenei masina o Mati lea sa pa’u tonu i le Aso Toonai na tea nei, ma le umusa ai i le Aso Faraile ua mavae o se maota tele o se hall, a le Mafutaga a Tina Aoao o le Ekalesia Faapotopotoga Kerisiano i Samoa e pei ona fausia lea maota i totonu o le laumua o le Kolisi Maualuga o Papauta.
O se galuega e iai le talitonuga e tāua mo faatasiga tetele a le Ekalesia aemaise le Mafutaga a Tina, ma isi sauniga e toatele tagata e auai ai. I le faasalalauina ai e le televise a le Ekalesia o le sauniga na tatala aloaia ai le galuega sa faailoa ai e $8miliona 808 afe, 945 tala le tau atoa, ae o loo iai le aitalafu e silia ile 3 miliona 708 afe tala.
Ua talosaga ai le mafutaga a tina i le Ekalesia Aoao na te totogi le 3 miliona ae galulue le mafutaga e totogi le 708 afe ma le 945 tala.
O le masina o Iulai o le tausaga ua mavae na faia ai le sauniga o le suaina o le eleele, ae o le aso 17 o Setema o le tausaga lava na tea nei na tuu ifo ai le maa faavae o le galuega ma amata ai loa ona fausia. E tolu vaega o le Mafutaga Aoao a Tina a le EFKS sa faatupeina le galuega, o le komiti o faletua o faifeau toeina, o le sosaiete o le tautua puapuaga o tagata, ma le mafutaga aoao.
O le afioga ile masiofo a le afioga ile Ao Mamalu o le Malo le afioga Faamausili Leinafo Tuimalealiifano sa ia ooti le lipine e aloaia ai le tatalaina o le maota poo le halo. Sa auai foi le Ao Mamalu o le Malo le afioga Tuimaleaiifano Vaaleto’a Sualauvi II faapea taitai ma le maave eseese o le ekalesia faapea malo valaaulia.
