Ua faamauina i talafaasolopito o le Iunivesite Aoao o Samoa le tausaga lenei 2024, ona ua oo ai le aofa’iga o fanau faauu mai a’oa’oga o matātā eseese i le 500.
Ua faailoa i le upega tafa’ilagi o le televise a le iunivesite na faasalalauina le faauuga i le Aso Lua o lenei vaiaso, a faatusatusa i faauuga o tausaga ua tuana’i e i lalo mai o le 500 fanau e faauu, peitai o le faai’uina o a’oa’oga o lenei tausaga e 512 i latou ua faauu ma ua maua tusipasi, o faailoga tipiloma ma faailoga tikeri, i matātā eseese sa a’ooga ai.
O le faauuga foi lea na faailoa ai e le Pule Sili o le Iunivesite nisi o faiaoga ua mae’a a latou a’oa’oga i iunivesite i Niu Sila ma ua toe foi mai ua faamanuiaina i faailoga foma’i poo le Doctor of Philosophy.
O le Faaao o le Iunivesite le afioga i le Ao Mamalu o le Malo na malele i le saunoaga faamanuia mo le aufaauu, ae o se tasi o le aufaauu na tapenaina le saunoaga faafetai.
Le malelega faamanuia mo le aufaauu mai le Faaao o le Iunivesite le afioga i le Ao Mamalu o le Malo, Afioga Tuimalealiifano Vaaletoa Sualauvi II ma le saunoaga faafetai mai le aufaauu mai le susuga Junior Papalii.
O le vaiaso na te’a nei na faia ai le faauuga a le Iunivesite Aoao o Samoa mo fanau ua mae’a le taumafai i le vasega o le tausaga faavae le Foundation.
