O le tina talavou ia Halima Cissé mai Mali na faateia ina ua ola ma faamanuiaina ni pepe e toa 9. O le mafuaaga o le faateia o lea tinā ona e le’i iai se manatu o le aofai lea o lana fanau auā e toa 7 lava na mautinoa i taimi na fai ai siaki a le falemai ae fanau ifo ua faaopopo le isi toa lua.
Taua e le toalua o Halima o le tamā foi lea o pepe e to’a 9 “lagona le fiafia o loo manuia uma lona toalua ma lana fanau.”
E pei ona silafia o pepe nei e to’aiva e aofia ai tama e toafa ma teine e toalima. O se talafaasolopito lea i le lalolagi i le mafai ai ona fanauina e se tinā o pepe e toaiva. Taua mai i ripoti o le Falemai i Morocco lea na ola ai lenei tinā.
Talu ai ona o loo loma le faamanatuina o le Aso faapitoa mo Tinā (Mothers Day) ua talafeauga lelei lenei meaalofa a le Atua i lea tinā ma le faamanatu ai o le taua o Tinā i totonu o aiga, ma lo latou malosiaga.
E sa’o ai le alagaupu Samoa “E au le inailau a Tamaitai”
