Ua lagona e le asosi o galuega faatusitala ma faasalalau a Samoa le faafiafiaina o tapenaga o lenei tausaga i le tula’i mai o le faalapotopotoga o faasalalauga a Peletania le BBC e fesoasoani i le siitia o ana galuega mo le faaleleia o lea tomai i lo tatou atunuu aemaise o le atina’e o le asosi.
O le sui Komesina Maualuga o le malo o Peletania i Samoa ma sui o le polokalame fesoasoani ua faaigoaina o le BBC Media Action na latou faamautū lea foai tupe faatasi ai ma le Pelesetene ma sui o le komiti faafoe o le JAWS le asosi lea o tusitala ma tagata faasalalau a Samoa, e ala i se sainiga lima.
Ua faaalia e le sui o lea malo le agaga o le fia fesoasoani mai o Peletania e faaleleia lea tautua auā o se galuega e tāua i totonu o pulegamalo faatemokarasi.
Ua faailoa e le JAWS o le fesoasoani tupe e 12 afe pauni tupe Peletania o le a maua i totonu o le 12 masina o le tausaga o le a faaalu i le tapenaina o se ta’iala e limata’ita’iina ai galuega tau i le pulea lelei o le asosi, aemaise o le siitia o le tulaga maualuga e tatau ona ausia e le galuega faatusitala ma faasalalau faapea le faatupeina o isi galuega tau lotoifale a le asosi.
O se tasi o fesoasoani ua faamautū mo le JAWS o le fesoasaoani a le polokalame a Ausetalia le PACMAS o le a faatupe ai le faagaioia o se ofisa ma le totogiina o se tagata e vaaia le ofisa mo le faatinoina o galuega a le asosi o tusitala ma tagata faasalalau a Samoa.
O loo sa’ilia i le taimi nei se avanoa o se potu i se maota e tu i totonu o le taulaga mo le ofisa o le JAWS.
