Ua tatali nei se faai’uga a le faamasinoga i le moliaga solitulafono o le faia o se faasalalauga taufaaleaga o loo tuua’ia ai le sui faasalalau o le Samoa Toe Faaolaola i Sini Ausetalia, le susuga Tiumalumatua Maifea Fetu, ina ua lē talia lana talosaga e ala i ana loia e to’alua o Sefo Ainu’u ma Faimalomatumua Mathew Lemisio, e leai ni mau a leoleo e faamaonia ai le moliaga poo le no case to answer.

O le lē talia o lea finauga ua tapena ai nei loia a leoleo ma lē ua molia e tuuina atu ni folasaga faai’u ma aumai ai se faai’uga i le Aso Lulu o le vaiaso nei.

O le isi talosaga a lē ua molia na su’esu’eina muamua ma lē talia, ina ia faalēaogā le moliaga ona o le tala taufaaleaga ua tuua’ia ai sa faia i Ausetalia ae lē o totonu o Samoa.