O le matāfaga o loo lumāfale iai le malumalu ma nisi o aiga o le afio’aga o Vaiala, o se nofoaga e tumutumu iai tafaoga ma ta’elega, ae mālōlō foi iai nisi ma faasavili ai pe a vevela le aso, faapea le mālū o le afiafi e oo i le po.
Peita’i ua faia nei le vavao a le afio’aga ina ia tausia ai le mamalu o pulega a alii ma faipule.
Ua faasino tonu le finagalo o le nuu i fetaula’iga o auala i le magafā aga’i i le apitagalu o iai le aai, se’i pā’ia lumāmaota o falenofo o le malo i Matautu-tai.
Ua faasino tonu ai foi le finagalo o le nuu e ala i lana vavao i tagata o loo tafafao ma faia evaga i le taligalu i Aso Sa ma aso o le vaiaso aemaise i le po.
Ua amata ai le vavao i le ‘afa o le 6 i le afiafi mo faigālotu, ona ta lea o le taga i le 7 i le afiafi.
O le 10 i le po e faaauau ai le vavao se’ia oo i le 6 i le taeao o le aso e sosoo ai, o lona uiga e lē toe maua se avanoa o soo se tagata tafao ma eva i le po e afea ai nofoaga o loo faamamafa i le vavao a le afio’aga o Vaiala.
E tāua le faailoa atu o lea vavao auā e to’atele o tatou tagata e malaga mai fafo e afea e nisi le apitāgalu ma le matāfaga o lea afio’aga mo tafaoga ma evaga i le po.
