Ua toe faaopoopo le isi 6 masina e faaauau ai galuega o le maota fogafale tolu o le Faletupe Tutotonu o Samoa o loo fausia i luga o se fanua e tusa ma le 6 eka lona telē i Ululoloa.
Ua faailoa ai e le Minisita o Tupe o loo iai ma le vaaia o lea faletupe o le tatou malo, ua faaopoopo lea ono masina e faamae’a ai le galuega e aunoa ma se isi totogi faaopoopo.
O lea maota fou o le faletupe tutotonu e 31 miliona lona tau atoa ma o Aperila o le tausaga e 2024 na amata ai le galuega.
O se maota ua fausia i se fuafuaga e faafetaui ai suiga o le tau i ni mala faalenatura e tula’i mai, ae o loo iai se isi nofoaga e faamautū iai tagata faigaluega faapea ma ana faamaumauga uma.
O le konekarate faufale o le Apex Solutions Limited o loo fausia lea maota fogafale tolu.
