O loo faaauau pea su’esu’ega a leoleo i ni alii seila se to’aono o loo tuua’ia i le umia ma le faatauina atu o le nakoti poo le fuālaau faasāina o le ‘aisa, ma ua faailoa e le Sui Komesina o le Matāgaluega o Leoleo Falepuipui ma le Toe Fuata’ina, toe lua vaiaso ona mae’a lea o ia su’esu’ega.
Peita’i o su’esu’ega o loo faagasolo ua faamautū ai nisi o mau e mafai ai ona molia nisi o ia alii seila i le solitulafono o le official corruption poo le moliaga lea o le faia o ni gaioiga faaālatua a o avea ai ma tagata faigaluega i le malo.
Faaalia e le Sui Komesina le susuga Leiataualesā Samuelu Afamasaga, o le tasi o alii seila e to’afitu ai i latou sa tuua’ia ua maliu i se gaioiga ua ia faamatalaina o le pule i le soifua.
