O se tala faanoanoa le oo mai o faamatalaga, o lē toe fa’aauauina le iai o le ‘au a le Moana Pasifika pe a mae’a le taamilosaga o lenei tausaga 2026.
O lona uiga o le a lē toe vaaia lea ‘au a le pasefika i taaloga faitaulia o le Super Rugby Pacific.
I se pepa o faamatalaga mai le ‘au, na faamauina o se faaiuga na faia i le mae’a o se iloiloga ma tulaga o iai le tamaoaiga i le faafoefoeina o lenei ‘au.
Fa’aalia e le taitaifono o le kalapu, le faigata tele o le faaiuga ma o se tulaga faanoanoa tele lea, peita’i ua fai lava sina tele o aafiaga ua fetaia’i ma le kalapu, o le ala lea ua lē mafai ai ona fa’aauau faamoemoega uma.
Ta’ua e le taitaifono, e latou lagona faatasi le tigā ona o le tulaga ua iai ae latou faafetaia pea alii taaalo mo a latou taumafaiga ma le naunau ina ia tumati’e le ‘au a le Moana Pasifika.
Mo le silafia na faavae mai le kalapu i le tausaga 2021 tauala mai le faalapotopotoga tumaoti o le Moana Pasifika Charitable Trust, e pei faavaeaina e le susuga ia Savae Sir Michael Jones KNZM ma Tuifa’asisina Sir Bryan Williams KNZM.
Na ofi aloa’ia le ‘au i le Super Rugby Pacific i le tausaga na sosoo ai 2022 ma le naunauta’iga o se ala atia’e ai tama taaalo mai le pasefika.
E ui i luitau ma faigatua ua feagai ma le ‘au o loo faalia le mitamita ma le faagaeetia i mea ua mafai ona o latou ausia ma mafai ona faatunuuina aemaise le mafai ona o latou aumaia faatasi o tagatanuu eseese o le atu pasefika.
Puna o Faamatalaga: Moana Pasifika Press Release
