Ua faasala nei e le faamasinoga le alii o Shane Timu e faanofo vaavaaia i le fale poo le home detention, i se matāupu na faailo ai e le faamasino na tauaveina lea matāupu o se mea mata’utia le vave atu o le tuaoi semanū e faateteleina ma ogaoga se tulaga e oo iai.
O lenei matāupu e tusa ai ma ripoti mai le Radio New Zealand, o loo ta’ua ai le faasalavei o se tuaoi i se misa’aga tele, lea na ia aveesea ai le agaese poo se naifi mai le lima o Shane Timu ina ua ia faaoomanu’a i le tamā o lana uo teine poo lana paaga; e faapea na ia tatui faatolu, tulou, le tamã o lana uo teine.
I faamatalaga, na tā’ua o se faatasiga a aiga na tula’i mai ai se feeseesea’iga o le tamā ma Shane, ona o le lē fiafia o le tamā i le alii o Shane i le auala na tautala ai i lona afafine ona o vaaiga sauā na ia molimauina i lea taimi.
E le’i faailoa suafa o le tamā ma le tuaoi i taualumaga o le faamasinoga.
I tala’aga o lenei matāupu, e faamauina o le vevesi o Shane ma lana uo teine, na oso a’e ai le ita tele o le tamā lea na ia piki ai loa le pou o loo pipii ai se fu’a ma ia aga’i ai loa e faaleaga le taavale a Shane.
O lea na aga’i atu ai loa o Shane ma se pate (baseball bat) ma agai i le tamā.
Na oso Shane i lana taavale ma taumafai e alu ese ae velo ai loa e le tamā lana taavale i le pou, o lea na oso ai loa le ma’ema’eā o Shane ma ia osofa’i ai loa lea tamā.
E faalua ona tatui tulou e Shane le tamā o lana uo teine i le vae ma le tasi i le tua.
Na molimauina e le tuaoi le mea ua tupu o lea na ia tamo’e atu loa ma pu’e i lalo Shane ma aveese le naifi mai lona lima ma togi ese.
Na avatu faatopetope le tamā na aafia i le falema’i mo togafitiga.
Faaalia e Shane i leoleo na ia faia ona o tulaga e faasaoina mai ai o ia (self-defense) talu ai na alu atu le tamā ia te ia ma le pou e faaoolima ia te ia.
Na ioe Shane Timu o le faamau’alia faaoomanu’a tugā i se isi tagata e ala i le osofa’ia o lea tagata, pe ua ia faia se gaioiga faatalalē e lē amana’ia ai le tulaga saogalemu o se isi lava tagata.
E 10 masina e faasala ai e nofo vaavaaia i le fale poo le home detention.
Faailoa e Judge Collins ia Shane Timu, ua to’atele tagata ua maliliu i faalavelave faapenei, ma ana faapea e oo i se tulaga mata’utia e lē o le faasalaga lea e feagai ma ia.
I le tolaulauina o taualumaga o lenei matāupu, o lea na faamanino ai e le faamasino, o lea na aafia foi i le tulafono i le 2016, 2017, 2018 ma le tausaga 2025 i tulaga o sauāga ma gaioiga taufaamata’u e faaoo manu’a ma faaoo le oti.
Ma e le’i faasala faafalepuipui lava o ia e ui na taofia mo le masina i moliaga o loo iai nei. Na māua foi na iai le taimi na māta’itūina ai o ia e ala i le faia o se tauvae poo le ankle bracelet a o tatala ai i tua i ni ta’iala faaletulafono.
Na faamanino e Collins e lē toe fesiligia lava le tulaga e oo iai Shane pe a toe oo atu i luma o le faamasinoga.
Puna o Faamatalaga: https://www.rnz.co.nz/news/national/591642/hastings-man-shane-timu-stabbed-partner-s-father-in-leg-and-back-gets-home-detention
