Ua lē mafai ona malaga i Ausetalia le tama’ita’i o Doris Te’o e asi ona alo o loo fa’amautū ai ona ua teena lana talosaga, sa finauina ai e lana loia se fetuuna’iga o aiaiga o loo tatala ai i tua. O loo molia Doris ma nisi tagata i ni solitulafono o le umia o le fuala’au faasāina o le ‘aisa e mafua i se osofaiga a leoleo na alu i Lotopa ia Setema o le tausaga ua mavae, ma o le masina o Iuni o le tausaga nei e valaau ai molimau a leoleo.
Sa tuuina atu e lē ua molia lana talosaga e malaga i Ausetalia e asi ona alo ma lona aiga, ae toe foi mai i le aso ua faatulaga o lona faamasinoga.
Sa ia tuuina atu nisi o tapenaga e lagolago ai lea talosaga faatasi ai ma le tusi mai lana faifeau faapea ma nisi e saini e faamaonia ai lona toe foi mai i Samoa. Peitai e leai ni faamatalaga tusitusia poo ai ia tagata e toalua ae poo ai foi suafa.
Sa finau leoleo e teena le talosaga i le mau e atugalu i lē toe foi mai lē ua molia, ona o loo ia umia tulaga tagatanuu o Niusila ma Ausetalia, ma afai ae le toe taliu mai i lona faamasinoga o le a umi se taimi e tapena ai aiaiga faaletulafono e aumai faamalosi ai e tali ona moliaga.
O se isi lea o finauga malosi a leoleo ua faavae ai le faaiuga a le faamasinoga e teena le faia ose fetuunaiga i aiaiga o loo tatala ai i tua ma ua fa’aauau pea ia aiaiga, ma le faatonuga e tatau ona tulai mo lona faamasinoga i le vaiaso e amata i le aso 8 o Iuni.
