E 25 tausaga o se tama’ita’i Samoa ua manuia nei taumafaiga, i le avea ai o ia ma tagatanuu o Aotearoa nei. O se mataupu na talia i le galuega alofa o lea tama’ita’i i fanau a lona uso ua faiilagi le folauga.
I talaaga o lenei e faapea, na malaga mai lea mafine i Niu Sila e asiasi mai i lona uso ma si ana fanau e to’alima i le tausaga 2023. Na manatu o le a iai mo sina taimi i le atunuu, ae peita’i na faafuase’ia ona maliu si ona uso e ana le fanau, ma faafuase’i ai loa le avea o lea tamaitai 25 tausaga ma le matua e vaaia ma tausia na fanau.
I ripoti mai le Newstalk ZB na faamauina ai, o i lea na taumafai atu ai lea mafine e talosaga mo le avea ai o ia o se tagatanuu o le atunuu poo le resident i le Gagana Peretania, ae pagā na lē taliaina lana talosaga, talu ai e le’i ausia e lea tama’ita’i aiaiga uma o le avea ai o ia ma tagatanuu.
Talu ai le tāua tele o le tausia lelei o le fanau o si ona uso, o lea na ia apili ai le faaiuga a le Ofisa o Femalaga’iga i le Komiti o Iloiloga o Femalaga’iga ma Puipuiga poo le Immigration and Protection Tribunal, ma o lea na lilifa ai manatu ma lagona a le Komiti i le talosaga a lea tama’ita’i.
Faamauina le tele o molimau faaalia o le maoa’e o taumafaiga a lenei tama’ita’i ina ia tausia lelei nai ona tei e pei ona iai foi le tele o faamaumauga na faailo e sui na lagolagoina lana talosaga, i le mata’utia o galuega ma taumafaiga a lea mafine ina ia auai uma i polokalame faaleaoaoga a nai fanau ua aafia ma o se tasi ua tele lona sao i mea fai eseese. Na faaalia foi e tamaiti o latou lagona, e faapea o le latou tinā lona lua lea i lo latou aiga.
O le finau o le mafine mo nai ona tei lea na talia ai loa e le komiti iloilo poo le tribunal le avea ai o ia ma tagatanuu o Niu Sila, ma fa’aauau ai le galuega o le tausia o nai fanau.
I ripoti e faapea e mai 5-13 tausaga le matutua o nai fanau.
Puna o Faamatalaga: https://www.newstalkzb.co.nz/news/national/samoan-woman-granted-residency-after-taking-over-children-s-care-when-her-sister-died/
