O le Aso Gafua o lenei vaiaso na faato’a maua mai ai le faaiuga tusitusia a le afioga Talasa Atoa Sa’aga, le tama’ita’i faamasino sa su’esu’eina moliaga o le palemia susuga Laaulialemalietoa Leuatea Polataivao Fosi Schmidt, ma isi e to’alima e aofia ai Samuelu Leau Fauega, Sivai Kepi Mamea, Li’o Faataumalama Auava, Fepuleai Faimata Su’a, ma Lise Marie Schmidt.
Ua aumai ai se fautuaga ae lē o se faatonuga, i le tāua o le faia o se su’esu’ega tuto’atasi poo se independent investigation, i le maliu o Tu’u’au Maletino lea na fano lona soifua i se faalavelave tau taavale ia Aperila o le tausaga e 2021.
O se suesuega e faia epei ona fautuaina e le faamasino o le a mafai ona taoto tonu mai ai mafuaaga, aemaise poo ai e aafia.
O sea foi su’esu’ega tuto’atasi e manino ai le mata o le vai i le tu’uaia o le tofa Lealailepule Rimoni Aiafi ma ni sui o le palemene ma nisi tagata ma faamāmā ai o latou suafa. Ua faailoa ai e le faamasino le faatonuga a lē sa avea ma sui palemia i le taimi na toe alia’e ai lenei mataupu i le faia o se su’esu’ega tuto’atasi peita’i mo le silafia e le’i taunuu ona faia lea su’esu’ega.
Ua manino mai i le faaiuga tusitusia e le faamaonia moliaga e lua o le taupulepule e taofi le faia o le amiotonu faasaga i le susuga Laauliamlemalietoa Leuatea Polataivao Fosi, e le faamaonia moliaga faapea o Lio Faataumalama Auava, ma e faapena foi ona le faamaonia ia moliaga sa tuuaia ai le afioga Fepuleai Faimata Su’a.
O Samuelu e 16 moliaga o lona faia o ni mau sese ma le sa’o poo fabricated evidence, ae faamaonia moliaga e 15 faasino i solitulafono o le faia o faamatalaga tau faasese, taufaaleaga ma moliaga o le faasoesa poo le harassment. O lona moliaga e tasi o le taupulepule e taofia le faia o le amiotonu e le faamaonia.
O Sivai Kepi e le faamaonia moliaga e 16 o le faia o molimau sese, le faamaonia moliaga e 2 o le taupulepule e taofi le faia o le amiotonu, faapea foi ona le faamaonia moliaga e 2 sa molia ai ma se tasi o le to’aono sa tuuaia o le faalavelave ile faia o le amiotonu.
O moliaga o Sivai ua faamaonia ile aofaiga e 4 o tuuaiga ia o lona faia oni faamatalaga tau faasese i leoleo. O Lise e 5 ona moliaga ua le faamaonia faasino i solitulafono o le auaufaatasi pe taupulepule e taofi le faia o le amiotonu ma lona fesoasoani i se tagata o loo tuuaia i se solitulafono, ae faamaonia lona moliaga o lona soli o aiaiga sa tatala ai i tua.
Ua faailoa ai i le faaiuga tusitusia o le aso 30 o le masina nei o Aperila e lauina ai se faasalaga o moliaga ua faamaonia o i latou e toatolu e aofia ai Samuelu, Sivai ma Lise. I le faaiuga tusitusia e 197 ona itulau ua faailoa ai e le afioga i le tamaitai faamasino o Talasa Atoa Saaga, o le a faase’e tuāgalu mai le toe se’ei i soo se mataupu tau faamasinoga e toe molia ai i latou e toa’ono sa tuuaia.
