I le tolopo atu ai nei i le Aso Lua o le vaiaso fou o galuega a le faamasinoga o palota e toe vāiliili ai nisi o tapenaga e faasino i le lē auai o molimau e 49 na poloa’ina e oo atu i le su’esu’eina o le tagi tau palota a Falealili 1, ma le selau afe tālā na ave e le faipule o lea itumalo i le na faauluina le tagi i se gaioiga e ave ai i tua le tagi tau palota, o lea ua aumai minute o taualumaga o lea mataupu i le Aso Lua o le vaiaso nei, ua faailoa ai e le afioga i le Faamasino Sili le faatalia ai o se tapenaga a le tama’ita’i Loia Sili le afioga Mauga Precious Chang, i lona le tatau lea ona aafia i iloiloga a lona ofisa lea ua ave iai ia vaega mo se tapenaga talafeagai.
Ua toe faailoa ai e le Faamasino Sili le afioga Satiu Simativa Perese, o le Aso Lua asau pe a toe fofogaina le mataupu e tatau ona faailoa atu ai e le Loia Sili sona finagalo ma se tapenaga o le a ia faatino.
E tatau ona oo atu i le Aso Lua a sau ua faailoa e le Loia Sili i le faamasinoga o palota lona lē auai i soo se tapenaga o mataupu ua tuuina atu i lona ofisa mo se iloiloga e aofia ai le fautuaina o tagata faigaluega poo le mataitu o galuega a lona ofisa ao faagasolo ia iloiloga.
O le finagalo o le faamasinoga e lē tatau ona iai se aafiaga o le Loia Sili i lea galuega ona o ia o se tasi o loia ao lei avea ma Loia Sili a le malo, sa lotolotoi i le tagi tau palota lea sa tulai ai ma se tasi o loia mo le sui faipule o lea itumalo.
Ua faafetai ai le Faamasino Sili ile Loia Sili ona ua faailoa atu e se tasi o loia sinia i lona ofisa e lei auai ma iai ni ona aafiaga i ni soalaupulega o le mataupu talu ona tuuina atu i le ofisa o le Loia Sili le finagalo o le faamasinoga o palota faatatau i ni iloiloga e faatino i le solitulafono o le faalēmigao i le faamasinoga le contempt of court ma le selau afe tālā na fa’aaoga i le faamoemoe e ave ai i tua le tagi tau palota.
O le auai o isi loia o le Ofisa o le Loia Sili i taualumaga o lenei mataupu o loo avea ai ma uo a le Faamasinoga e tuuina atu fautuaga faaletulafono.
