O le puipuia lelei o ogasami faatulafonoina o Samoa mai ni aafiaga e mafua mai i gaioiga eseese, e pei o vaa feoai, o fagotaga, ma galuega tau i malosiaga ua faamautu ai se fesoasoani tupe e 2.5 miliona le tupe Amerika poo le lata i le 7 miliona tala Samoa.
O lea fesoasoani tupe o le a faamatuu mai e le faalapotopotoga faavae e ta’ua o le Waitt Foundation o loo galulue faatasi ma le faalapotopotoga faavaomalo mo le faasaoina ma le puipuia lelei o le siosiomaga le Conservation International.
O le fuafuaga alualu mamao a Samoa o le tausaga e 2020 o loo faataoto ai fuafuaga mo le puipuia o o tatou ogasami i le faamoemoe e fa’aauau ona maua ai pea taumafa, ma puipui malu le ola faalenatura o meaola o le sami e faalagolago iai tagata.
O le Minisita o le Matagaluega o Punaoa, Faalenatura ma le Siosiomaga, le tofa, Ale Vena Ale sa avea ma sui o le malo o Samoa e molimauina le faamautu ai o lea fesoasoani tau tupe.
