Ua tauaao nei e le Matagaluega o le Soifua Mālōlōina le tolu o masini e siaki ma togafiti ai le gasegase o le fatu, e ala i le agalelei o le Faalapotopotoga o Taui o Faalavelave Faafuase’i na latou faatupe le faatauina o ia masini.
Ua faailoa ai e le minisita o le matagaluega le tofa Vaaaoao Salumalo Alofipo i lana saunoaga i le sauniga na tauaao ai lea foai e le Minisita o le Faalapotopotoga o Taui o Faalavelave Faafuase’i o ni masini o le a fai ma mata ma taliga o le ‘au galulue i le tomai faafomai e lē gata o le a vave iloa ai ni faaletonu ae o le a tuuitiitia ai le ave o ni gasegase o le fatu i atunuu mamao ae faatino lava i Samoa togafitiga.
Faaalia e le Minisita ua ogatasi le agalelei o le Faalapotopotoga o Taui o Faalavelave Faafuase’i i le faatupe o ia masini ma le taiala a le malo i le atinae o Samoa faapea fuafuaga alualu mamao a le Matagaluega o le Soifua Mālōlōina mo le tausaga 2019 i le tausaga e 2030.
