Ua faamaonia mai nei i lipoti, e toʻavalu ni tagata na manunuʻa i le taeao nei ina ua fetoʻai se pasi ma se laau i Elliot Street, i Papakura.

Na tulaʻi mai le faalavelave i le toe 15 minute i le itula e 9 i le taeao.

Ua faamauina na aga’i ane fesoasoani muamua, o le St John Ambulance i le itu na tulai ai lea faalavelave, ma faatino ai a latou iloiloga ma su’esu’ega i ni aafiaga o le pasese o le pasi. 

Māua i lipoti mai le 1News, e to’atolu na ave i le falemai i Middlemore, faamauina o le toʻalua o loo i se tulaga tigāina, ma le to’atasi e manu’a mitimiti, e le’i tugā ni aafiaga i ona manu’aga.

E toʻalua na aga’i i se falemaʻi e lata ane mo togafitiga, ae o le isi to’atolu na togafitia lava i le nofoaga na tupu ai le faalavelave. 

Faamauina o lenei pasi e malaga i le va o Papakura ma Park Estate.

Ua faailoa le faatino ai o su’esu’ega a leoleo i lea nofoaga, ma ua fautuaina le mamalu o le atunuu femalagaa’i ina ina ia ‘alofia le aga’i atu i lea faaitu. 

Na faailoa foi e le Auckland Transport o loo galulue faatasi ma auaunaga tau faalavelave faafuaseʻi faapea le kamupani o pasi, Ritchies, auā le su’esu’eina lelei o lenei matāupu. 

Ua faailoa foi e le faatonu mo femalagaa’iga lautele a le Auckland Transport ia Stacey van der Putten lo latou tau’au fesoasoani mo le mamalu o le pasese sa i luga o le pasi i le taimi na tula’i ai lea faalavelave.

Puna o Faamatalaga: https://www.1news.co.nz/2025/05/07/injuries-after-school-bus-hits-tree-in-south-auckland/