Ua to’alua nei loia sinia o le atunuu ua tauaveina le tofiga Sui Peresetene ma Faamasino o le Faamasinoga o Fanua ma Suafa, ina ua filifilia e le Komisi o Galuega a lea faamasinoga tāua a Samoa le tama’ita’i loia sinia, le afioga, Siliga Diana Peters Roma e avea ma se tasi o sui peresetene.
O le a see lua ai ma le afioga, Afamasaga Michael Soonalole o se isi loia sinia na uluai tofia e avea ma sui persetene ia Fepuari o le tausaga e 2023.
E tofia ma filifilia le afioga Siliga Diana Peters Roma o loo galue i lona ofisa loia tumaoti lea sa ia faafoe ai mataupu eseese sa ia finauina i luma o le faamasinoga faaitumalo ma le faamasinoga maualuga a Samoa. Ua faamaonia mai e le Ofisa Sili o le Pulega o le Matagaluega o Faamasinoga ma le Faafoeina o Mataupu tau
Faamasinoga le susuga, Papalii John Taimalelagi Afele le fiilifiliga o le tama’ita’i loia sinia i lea tofiga maualuga i le Faamasinoga o Fanua ma Suafa, ae o le afioga Siliga Diana Roma o le uluai tama’ita’i loia sinia ua tauaveina lea tofiga talu ona mae’a pasia e le palemene teuteuga o le tulafono o faamasinoga o fanua ma suafa lea o loo aiaia ai o se loia ua silia ma le valu tausaga talu ona galue faaloia, ma ua silia i le tolu tausaga o fainuu ma faatino ai ona tiute faamatai e pei o le faia o le monotaga, e agavaa ona talosaga e avea ma sui Pelesetene o le faamasinoga o fanua ma suafa.
E pei ona silafia o se tasi o loia sinia sa avea ma faamasino sinia i le faamasinoga maualuga a lo tatou atunuu le afioga Lesatele Rapi Vaai o loo faauluulu iai galuega a lea faamasinoga ma o loo tauaveina le tulaga o le Pelesetene o le faamasinoga o fanua ma suafa a Samoa.
O le Aso Tofi o le vaiaso fou e pei ona faailoa mai e le ofisa sili o le matagaluega o faamasinoga ma le faafoeina o mataupu tau faamasinoga o le a faatautō ai le sui pelesetene fou o lea faamasinoga a le atunuu o loo lipoi ai mataupu tau i suafa matai ma fanua faaleaganuu.
Aoaoga ma galuega sa tautua ai le afioga Siliga Diana Peters Roma
Faailoga Bachelor of Arts USP (1999); Bachelor of Laws, USP (2012) Admitted as a Barrister & Solicitor of Supreme Court of Samoa (2013)
Practised law at the private bar since admission in 2013 through – (i) Associate at Fepulea’i & Roma and later Fepulea’i Law Firm; and (ii) Principal, Roma Law from 2018 to now.
Prior to legal practice – worked for government through MOH & MWCSD; and UNDP & UNESCO.
Suafa matai o loo umia: Siliga (Vaitele), Lauano (Patamea) & Matuāvao (Salamumu) Married with 5 children & 1 grandchild.
