Ua faailoa nei e le Matagaluega o Punaoa, Faalenatura ma le Siosiomaga nuu ma afioaga o loo alala ai aiga i le motu o Upolu o le a maua fesoasoani tupe mai le malo, ona o a latou aseta ma meatotino aogā na faaleagaina i le motusia faafuasei o le eletise mai le aso 31 o Mati e oo i le aso 29 o Aperila o le tausaga na tea nei 2025.
E 82 le aofaiga atoa o ia nuu ma afioaga ae e lē o aofia ai pisinisi, o faalapotopotoga ma aoga sa aafia foi meatotino ae o loo lavea i lea fesoasoani tau tupe.
O le Aso Faraile o le vaiaso nei ma le Aso Gafua o le vaiaso asau o le a feiloai ai sui o ia aiga, o pisinisi ma aoga mo le faailoaina o le aofaiga oi latou ua manuia talosaga faapea ona sainia ai ma maliega e faamautu ai le aofai o le fesoasoani tupe e maua.
O le a faamautu ai foi ID poo pepa faamaonia e faamaonia ai aiga, o pisinisi ma faalapotopotoga o le a maua lea fesoasoani mai le malo.
O le maota fono o le Tuiatua Tupua Tamasese Efi i Sogi o le a feiloai ai sui o le komiti a le malo o loo galulue mo le tapenaina o lea fesoasoani ma i latou uma ua manuia talosaga.
