O le loia mai Ausetalia o Peter Lithgow o le a finauina le talosaga a le sui faipule o Falealili 1, o loo tatalo ai mo se toe iloiloina o taualumaga ma le faaiuga a le faamasinoga o palota, lea ua seei ai le afioga i le faamasino mai Niu Sila o Rhys Harrison.
O le vaega muamua o lea iloiloga o loo finau ai le sui faipule e faase’e atu i le Faamasinoga o Talosaga Apili lana finauga mo se iloiloga faaletulafono e tagofia ai, ua toe suia nei le aso e faia ai, mai le aso Gafua 20 o Aperila i le Aso Lulu 29 o le masina nei lava.
Ua faailoa e le afioga i le faamasino o Harrison ua ia talia le talosaga a le loia mo le sui faipule mo se isi avanoa faaopoopo e tapena ai ana folasaga faaletulafono poo legal submissions. E ui i lea fesuiaiga e pei ona faailoa i minute a le faamasinoga maualuga o loo talia e le loia a le itu talosaga le aso ua faamautu mo le su’esu’eina o le talosaga lea o le a faagasolo i le tau amataga o le masina o Iuni.
I le faamasinoga o palota i le Aso Lua o lenei vaiaso sa toe valaau ai le mataupu i le selau afe tala ma le solitulafono o le faalēmigao i le faamasinoga e mafua mai i le tagi tau palota a Falealili 1.
O le valaauga lea sa oo atu loia mai le ofisa o le Loia Sili mo le faailoaina o le tulaga o loo tapena iai e tusa o le fautuaga a lea faamasinoga e silasila i se faaiuga tatau i le selau afe tālā na aafia i le taumafaiga e toe ave i tua le tagi tau palota, ma le lē oo atu o molimau i le su’esu’eina o moliaga o le tagi tau palota poo le election petition.
Fa’aalia e loia mai le Ofisa o le Loia Sili o loo malaga i fafo le Loia Sili i sana malaga tau ia te ia lava, ma o loo taumafai iai ni fesootaiga e logo iai tulaga o lea tapenaga.
