16 Aperila 2026
Tusia: Lilomaiava Maina Misa-Vai
Ua faamaonia e le Faamasinoga moliaga e lima o le alii faifeau ia Petaia Setu. O le Ekalesia Metotisi Fou Tutoatasi i Vaitele Fou e pei ona ia faia ai ni faiga aiga faamalosi ma ni amioga matagā i se teine o lana aulotu 18 tausaga le matua i le tausaga 2023-2024.
Na autasi le laulau a faatonu poo Faamasino o le Mau (assessors) ma tuuina mai ai la latou faaiuga i le afiafi nei.
Ua faamaonia le moliaga e tasi o le faia o se faigā aiga Faamalosi poo le Tosoteine (Sexual Violation by Rape)
Ua faamaonia foi moliaga e tolu o le faia o fesootaiga tau feusua’iga lē faatulafonoina (Sexual Violation by unlawful Sexual Connection)
Ua faamaonia foi le moliaga e tasi o le Faaoogalima Matagā (Indecent Act)
O le 5:30 pm na tuuina mai ai le faaiuga a Faatonu sa feagai ma iloiloga o le mau faatatau i le mataupu lenei, ina ua ma’ea ai lauga faai’u a loia mai le itu a leoleo faapea foi le itu tete’e aemaise le lauga ta aofai ai le mataupu a lana Afioga i le Faamasino ia Fepulea’i Ameperosa Roma.
O ananafi lea na toe faaui ai tua moliaga e fa e le itu a leoleo ona i la latou vaai e leai se vaega e faamaonia ai i totonu o le mau a le ua aafia ia moliaga, ona totoe ai lea o moliaga e lima lea na faaauau mai ai le Faamasinoga i le asō.
O le molimau mulimuli a’o lei tapunia e le itu a leoleo le mataupu o le faletua o le alii faifeau lea sa ia talanoa ai i le Mafutaga ma le tinā o le tinā o lē ua aafia. E le gata i lea o mea na tutupu na ia ta’ua ai o le taumafaiga lava sa ia taumafai iai mo le agaga o le tinā o le tinā o lē ua aafia ina ua lē toe alu atu i le lotu.
Peitai sa ia molimau na la oo i le aiga o le ua aafia ma sa fusifusi ma fetagisi ma le tinā ma la faatoese iai, e faamagalo mai laua.
E le gata I lea sa ia taua fo’i faatoa iloa e le alii faifeau lea mataupu ina ua ia ta’uina iai i le taimi na la oo ai i le tinā o le tinā o lē ua aafia e faamalosi iai ia sau i le lotu ma mea e fai.
Sa ia faailoa foi le tuuaiga o le faifeau e le grandfather o lē ua aafia i le 2021 i se faapouliuli a le loomatua (grandmother) ma lē ua molia peitai na te lei aveina le tusi na tuuina atu e le grandfather o lē ua aafia i le faifeau ae sa ia laulauina i luma o le Mafutaga Tinā o lea tusi e lei maua pe na tuuina atu foi i le Faamasinoga e fai ma mau ona o lana mau ua leiloa.
I lauga faai’u a loia na faamanino ai e le Tamaita’i Loia ia Muliagatele Tauanu’u Raewyn Fong I le laulau a Faatonu tulaga na tuliloa e le itu a leoleo Ina ia faamaonia moliaga.
O ia tulaga pe sa faatino faiga uma o loo taua i moliaga ma pe sa faia fo’i e aunoa ma se maliega o le ua aafia…
Sa ia tuuina atu fo’i itu o loo faapea mai ai le itu tete’e e le o o gatasi aso na ma mea na tutupu e pei ona taua I mau a tinā faapea le ua aafia, peitai na ia faamanino i le laulau a Faatonu e le o aso e taua ae o le faatumauina o le mau I mea na tutupu.
O le finauga a le itu tete’e na lauga ai le tamaita’i Loia ia Lucy Sio Ofoia ma ia ta’ua ai itu i aso i le eseesega, le gata i lea o le nofoaga lea na tupu ai le soligatulafono e lē o se nofoaga e lē o iai ni tagata ma a tu’u atu i le felataa’i o fale i le lotoa a le Ekalesia e faigata ona talitonuina le tutupu ai o ni mea faapea. O le a tuuina mai se faasalaga a le Faamasinoga i le Aso 13 o Me o le tausaga nei.
O loo tatala lava i tua le alii faifeau e faatali ai le faasalaga a le faamasinoga ia Me.
