O loo tulai i le faamasinoga maualuga a le atunuu i lenei vaiaso se tamā ua 67 tausaga lona soifua e tete’e i moliaga e 9 a leoleo e pei ona tuuaia ai i le faiaiga fai faamalosi, o le faiaiga i se gaioiga e solitulafono, ma le faia o ni gaioiga matagā.
O le ua molia o le susuga Petaia Setu o loo galulue ile tausia o le ekalesia Metotisi Fou i Vaitele fou. O le nofoaga lea o loo faaalia i tolaulauga a leoleo na faatino ai ia solitulafono o loo matua tē’ena malosi e lē ua molia.
Sa 18 tausaga o le teineitiiti na aafia i le taimi o le solitulafono ma o lana molimau i le Aso Gafua na amata ai ona su’esu’eina mau e se laulau o faatonu, sa ia faamatala ai gaioiga uma na faia ia te ia.
E toafa molimau a leoleo e aofia ai le leoleo na faia le suesuega, o le tina o le na aafia, ma le tina o le tuaa tina o le teineititi. O loo tapena foi molimau a le ua molia e tutulai e lagolago le tetee a le faifeau i moliaga uma a leoleo.
