E tele alāleo faasalalau poo leitio i totonu o Aukilani nei o le a lē mafai ona faafofoga iai le toatele o le ‘au faalologo amata atu lea i le Aso Tofi nei, aso 16 o Aperila 2026.
E afua mai i ni galuega faaleleia ua moomia ona faatino i le pou i Henderson. O lenei galuega o loo i lalo o le vaavaaiga a le leitio faavaomalo o Niu Sila (RNZ) ma o se tasi foi galuega ua faia ina ia suia ai pou mai le itu saute agai atu i mātū. O galuega ina ia saga faaleleia atili ai o auauanaga.
E tusa ai ma faamatalaga, e 122 mita le umī o le pou i Henderson o loo iai nei ma o le a galuluega ai, ma o le a tapē amata mai i le 35 minute e tea le afa o le 7 i le taeao mai le aso 16 o Aperila. O loo iai le faamoemoe e oo atu i le 2 vaiaso le faatino ai o ia galuega, ae e lē o mautū foi lea taimi talu ai tulaga loulouã o le tau, e ono faaumiumi ai le galuega.
Faaalia foi e le RNZ, o tulaga leva ua iai pou i tu matu ma saute, ua au tausagā o faaaoga mai lea ua tagai ai e faatino galuega faaleleia ma suia ai pou.
Ta’ua o le pou o loo i le itu mātū i le taimi nei ua 92 tausaga, o le pou i saute ua 71 tausaga ma o le ala ua manatu ai ina ia faatino loa iai se galuega.
Mo le silafia o tagata faalogologo, o alāleo o le a aafia e aofia
603 AM – Radio Waatea
702AM – Humm
810 AM – BBC (Auckland Radio Trust)
936 AM – Chinese Voice Radio
1080 AM – NZME Newstalk ZB
1251 AM – Radio Rhema
1386 AM – Radio Tarana ma le tatou leitio faalologo le Radio Samoa 1593 AM.
E ui o loo feagai ma nei faafitauli, o loo mafai pea ona faafofoga mai i le alāleo o le Radio Samoa i luga o upega tafāilagi, le Youtube, Facebook ma soo se online radio app ma auaunaga a le FM i Samoa.
