E ese mai le vaega ua mae’a ona faamaonia e le Malo ma ua faaaogā ai Fono Faavae mai Itumalo Faapalota e 51 mo le filifilia o i latou e agavaa mo galuega faavaitaimi o atunuu e pei o Niu Sila, Ausetalia, ma Amerika Samoa, o lea na saunoa le tama’ita’i Sui Palemia, o ia foi o le Minisita o Tupe, le afioga Mulipola Anarosa Ale-Molioo i le feiloa’iga ma tusitala, ua iai foi le faamaoniga a le Kapeneta mo nisi o auaunaga tuma’oti e latou te faafaigaluega tagata mo galuega nei faavaitaimi, ma e na o le pau foi na o auaunaga ua iai le faatagaga a le Malo.
O auaunaga nei poo Recruitment Agents ua leva ona galulue mo le auina atu o o tatou tagata mo galuega faavaitaimi, ma na saunoa Mulipola, o loo iai foi lo latou sao tāua i le faaauauina o lenei polokalame.
O auaunaga tuma’oti nei e 3:
- Pacific Work Force Group Limited
- Poutasi Development Trust
- Taimalie Charlie Ah Liki Westerlund
O le a galulue faatasi auaunaga tuma’oti nei ma le Matāgaluega o Pisinisi, Ālamanuia ma Leipa poo le MCIL i le filifilia o i latou e agavaa mo nei galuega faavaitaimi.
E $10,000 le tupe e tatau ona totogi e ia auaunaga poo pisinisi i le MCIL faato’ā mafai ai ona faatino le latou auaunaga mo le faafaigaluegaina o tagata i galuega faavaitaimi.
Mo Fono Faavae a Itumalo Faapalota, e $1,000 le tupe e tatau ona latou totogia, ae $50 tālā le tupe e totogi e le tagata ua maua le avanoa faigaluega ma ua mautinoa o le a malaga.
Lona uiga, e ese mai Fono Faavae ma nei pisinisi tuma’oti e tolu ua iai le faamaoniga a le Malo, e lē tatau ona toe iai nisi pisinisi e ese mai e mafai ona latou faia lea auaunaga se’i vaganā ua toe iai foi se isi faatagaga aloa’ia mai le Kapeneta.
