E lata i le lua tausaga na faamuta ai le auaunaga a le susuga Li’o Faataumalama Auava mai le Matāgaluega o Leoleo, Falepuipui ma le Toe Fuata’ina.
O lona toe ulufale ai i le matāgaluega sa tautua ai mo le 25 tausaga a o le’i faamālōlō i le masina o Iuni o le tausaga e 2024, o lea ua toe maua ai lona tulaga faaleoleo o le Ta’ita’i Leoleo poo le Police Inspector ma ua tofia e faauluulu iai le vaega o solitulafono e māfua i fesoota’iga faatekonolosi faaonaponei lea e ta’ua o le Cybercrime Unit.
E le’i manuia sa’iliga i se finagalo o le ta’ita’i leoleo, ae e pei ona silafia o le faamālōlō mai o lea malu o le malo i lana galuega faaleoleo e māfua ina ua faamaonia sona moliaga i le faamasinoga faaleoleo le Police Tribunal e māfua i le su’esu’ega na ia faia i le maliu o Tuuau Maletino i se faalavelave tau taavale e aunoa ma se ioega a le Komesina o leoleo ua mae’a lona taimi sa galue ai, le susuga Auapaau Logoitino Filipo.
O ia ma se tasi o tama’ita’i leoleo na auai i lea su’esu’ega na faamaonia foi lona moliaga ma faamuta ai ma lana tautua i le matāgaluega.
O le susuga Li’o Faataumalama na faamamā lona suafa i le moliaga o le taupulepule e taofi le faia o le amiotonu i le faamasinoga sa molia ai ma le Palemia lea ua lē faamaonia foi i lea moliaga.
O le faamamā ai o le suafa o lea malu o le malo na toe ulufale ai e faaauau lana tautua faaleoleo e pei ona toe maua lona tulaga o le ta’ita’i leoleo ma ua faauluulu iai se tasi o vaega tāua o le auaunaga a le Matāgaluega o Leoleo, Falepuipui ma le Toe Fuata’ina.
O le Aso Faraile na te’a nei i se pepa e faalauiloa ai fesuia’iga o vaega o le matāgaluega e galulue ai leoleo sinia, o loo faailoa ai lea filifiliga mo le susuga Li’o Faataumalama Auava.
