Ua lē finagalo le faipule o Falealili 1 le afioga Toelupe Maoiautele Poumulinuku Onesemo e tauave e le alii loia mai Ausetalia o Peter Lithgow lana talosaga e ave i le Faamasinoga o Talosaga Apili lana finauga e tagofia ai e pei ona faatulaga le Aso Lulu a sau, le aso 29 o Aperila e su’esu’eina ai.
Ua ia toe talosaga ai i le faamasinoga mo se isi avanoa e tolopō ai lea su’esu’ega ae se’i toe sa’ili se isi ana loia mai fafo, peita’i ua teena e le faamasino mai Niu Sila o loo feagai ma lea matāupu tau faamasinoga, le afioga Justice Harrison le talosaga a le sui faipule, ae ua talia e le faamasinoga le isi ana talosaga e taofia i se tulaga lē tumau le malosi o le faai’uga ua faamaonia ai lona moliaga o le faia o faiga faaālatua ma le faamoemoe e faatosina ai se tagata palota lea ua soloia ai ma le nofoa o lea itumalo.
Faaalia e le faamasino sa tuu avanoa le faamasinoga i le faipule mo le 3 vaiaso ae tapena le loia mai Ausetalia sa ia filifilia ma māfua ai ona tolo mai le aso 20 o Aperila i le aso 29 o le masina nei lava le su’esu’eina o lana talosaga.
E lē o faailoaina e le faipule poo le ā le umi o se taimi e sa’ili ai sana loia mai fafo, ma ua fautuaina ai e sa’ili se loia i Samoa pe afai o le a lē avanoa atu le loia i lo tatou atunuu sa ia ulua’i finauina le tetee a le faipule i moliaga a o su’esu’eina le tagi tau palota e le faamasinoga o palota.
Ua faaalia i minute lona tolu a le faamasinoga i tapenaga o lea talosaga, o loo silafia ma malamalama lelei le sui faipule i taimi tapulaa o loo aiaia e le faamasinoga o faigāpalota e tatau ai ona valaau se palota laitiiti pe a avanoa le nofoa o le tofi faipule o se itumalo ma e tāua ai lona tausisia o taimi ua faatulaga e le faamasinoga e tuuina atu ai tapenaga uma a loia a o le’i su’esu’eina lana talosaga.
