E le’i mae’a le masina lenei o Aperila ua maua tupe o le taui 10 miliona tālā mo aiga ma tagata uma o le itumalo o Safata e māfua i aafiaga o le goto ai i gataifale o le itumalo o le manuao o le Manawanui.
Ua faailoa e le afioga i le tama’ita’i Sui Palemia ma le Minisita o Tupe, o loo pisi lana matāgaluega i le tapenaina o le tala faatatau autū o le tupe, ae e lē o tuua ai ma galuega mo le faamatuu atu o seleni o lea taui e pei ona fuafua o le a maua e le tagata e to’atasi le afe selau tālā ($1,100).
O le Aso Lulu o le vaiaso nei o le a feiloa’i ai tagata o le itumalo ma le komiti a le malo o loo faamaopoopoina tapenaga o le taui sefulu miliona lea ua faamoemoe e faamalamalama ai le faatinoga o le tufatufaga o seleni ma faasaini o latou suafa.
Ua faailoa e le tama’ita’i Ofisa Sili o le Matāgaluega o Puna’oa Faalenatura ma Si’osi’omaga o loo ta’ita’ifono i le komiti i se lipoti a le nusipepa o le Samoa Observer, ua faamautū nei le aofa’iga o tagata o Safata e 8,989 o le a maua le ta’i afe selau tālā a le tagata e to’atasi.
O le a faaalu ai se seleni e tusa ma le 9 miliona 887 afe ma le 900 tālā.
E totoe ai le seleni e selau sefulu afe tālā lea ua faatulaga o le a fesoasoani ai i pisinisi ua afaina talu le goto o le manuao i gataifale o Safata.
Peita’i o lea fesoasoani e pei ona faailoa e le Ofisa Sili le afioga Lealaisalanoa Frances Brown Reupena i lea lipoti, o le a faafoe mai e le pulega o tagata tafafao mai fafo.
