O le susuga Jack Olaf Lafoa’i ua 34 tausaga o lona soifua mai afio’aga o Utualii ma Fatitū i Saleimoa, ua manumalo le ata sa ia saunia ua avea nei ma faailoga poo le LOGO e ta’iala ai le sini o le atoaga o le 64 tausaga o le malo tuto’atasi o Samoa o le a faailoga ma faamanatu i le masina o Iuni o lenei tausaga.
O Samoa ua tasi mo se amataga fou, o le sini autū lea o le faailoga ua manumalo e pei ona sa faalauiloa aloa’ia i se sauniga sa auai ta’ita’i o le malo.
Ae mo le susuga Jack Olaf Lafoa’i o le taimi muamua lea ua auai i se tauvaga ua filifilia ai le ata na ia saunia, lea o loo faailoa ai le tagāvai poo le fu’a o le tatou malo tuto’atasi ua avea ma la o le vaa o loo folau, ae faaopoopo iai ma le tanoa palu’ava, o le tootoo ma le fue, ae vali i lanu o le tagāvai le lanumoana ma le mūmū.
Le susuga Jack Olaf Lafoa’i o Utualii ma Fatitū i Saleimoa ua sola ma le faailoga tupe e 3 afe tālā ina ua manumalo le ata na ia tusia ua avea ma faailoga o le faamanatuina o le 64 tausaga o le tatou Tuto’atasi.
O le tama’ita’i Sui Palemia afioga Mulipola Anarosa Ale-Molioo sa saunoa i le saunoaga autū i le faalauiloaina o le ata ua manumalo.
