Ua lē usita’ia e le vaega faaupufai o le S.N.D.P. le aiaiga faaletulafono o le totogi o le lesitala e tasi le afe tālā mo le tausaga na te’a nei 2025, ma ua soloia ai le lesitala mai le ofisa o le komisi o faigāpalota.
O se tasi lea o patī poo vaega faaupufai ua tele tausaga talu ona faatūina ma sa avea ma patī sa agaia le malo i ni paea’iga ua mavae a le Palemene.
A o lumana’i le palota tele o le tausaga e 2021, sa toe molimauina le lesitala o lea vaega faaupufai ma tauva ai nisi o ona sui faatutū i lea palota tele i le fu’a a le vaega faaupufai o le Faatuatua i le Atua Samoa ua Tasi, o se faiga sa lagolago atu ai ma nisi o patī faaupufai ma tauva foi o latou sui i le fu’a a le Faatuatua i le Atua Samoa ua Tasi i se finauga e suia le faigāmalo.
Na taunuu lava lea finauga i le suia o le pulegamalo ma tula’i ai le vaega faaupufai o le Faatuatua i le Atua Samoa ua Tasi i lana ulua’i pulegamalo sa ta’ita’i ai le sui faipule o Lotofaga o le ulua’i tama’ita’i o le atunuu sa avea ai ma Palemia.
O le patī o le S.N.D.P. poo le Samoa National Development Party o lona ulua’i ta’ita’i o le afioga i le Tamaaiga le afioga Tui Atua Tupua Tamasese Efi.
