A o lumana’i le masina o Me e faamautū uma ai tapenaga a le malo mo le faamanatuina o le 64 tausaga o le Tuto’atasi i le amataga o le masina o Iuni, ua faailoa e le tama’ita’i Sui Palemia o ia foi o le Minisita o Tupe le tau e 5 miliona tālā o le a faatupe ai tapenaga uma mo aso e tolu o le Sisigafu’a.
E amata i le aso 29 o Me polokalame i le solo i le taulaga i Apia a autaaalo, aso 30 le Aso Toonai o le umusaga o le maota fou o le a avea ma ofisa o le Fono Aoao Faitulafono, o le a faia ai taalolo o se tasi o faaaloalo faaleaganuu lea e 11 afio’aga ua filifilia mai Upolu ma Savaii o le a latou faatinoina.
I le tuuga fautasi ua faamautū e lima sa o le a masii mai Amerika Samoa e pei ona faailoa e le Sui Palemia le afioga Mulipola Anarosa Ale Molioo, e lua faailipu ae lima ausavali a tama’ita’i poo marching girls.
Ua iai foi nuu ma afio’aga ua filifilia mo le saunia o pese ma siva faaleaganuu.
Le afioga i le Minisita o Tupe o le Sui Palemia, afioga Mulipola Anarosa Ale Molioo.
