O galuega a le Faamasinoga Maualuga a Samoa i lenei masina o Aperila ua molimauina ai i solitulafono o le umia o fuālaau faasāina o le ‘aisa ma le maruana le faasala i le falepuipui o nisi ua molia ai.
O i latou fou ua nofosala sa maua i ni osofa’iga a leoleo.
E 4 tausaga ua falepuipui ai le taule’ale’a o Filipo Filipo o Lalovaea ma Magiagi ina ua faamaonia lona faaulufale i Samoa i se faamomoli na aumai mai Amerika Samoa o le 99 kalama o le ‘aisa.
O lea fuālaau faasāina na maua o loo fafao i totonu o se apasusu pauta.
O le alii o Joseph Iosefo Alosio ua nofosala mo le umi e 13 masina ina ua faamaonia lona umia le 3 tesimale 23 kalama o le ‘aisa, sa ia umia foi ni meafaitino e pei o se paipa e faaaogā e ula ai le ‘aisa ma se straw poo se meafaitino e mimiti ai le ‘aisa.
Na taofi e leoleo le pikiapu Toyota sa aveina e lea taule’ale’a ma maua ai i sa’iliga ia vaega ma le fuālaau faasāina o le ‘aisa.
O le taule’ale’a o Alema Semo Semanu e 12 masina ua falepuipui ai ina ua faamaonia lona ioeina o le moliaga o le umia o le ‘aisa e tusa ma le 0 tesimale 09 kalama, umia o sikareti maruana e 20 o le mamafa e tusa ma le 6 tesimale 95 kalama, umia o lālā maruana e tolu ma lona umia o se paipa ma se meafaitino o le straw.
O Mikaele Logovii Lemisio poo Koloseta Logovii e 5 masina ua nofosala ai i le falepuipui ina ua faamaonia lona umia o le ‘aisa.
O ia faasalaga uma ua toesea ai le taimi sa nofo taofia ai i latou a o faia su’esu’ega a leoleo.
O i latou ua faasala i le falepuipui e eseese taimi na faia ai osofa’iga a leoleo na maua ai i latou.
