O le Aso Gafua o lenei vaiaso ua faia ai se a’oa’oga ua auai nisi o alii ma tama’ita’i leoleo i Samoa ma se vaega o le fitafita o le vaatau poo le manuao o le malo o Farani o le FNS Bouganville lea o loo taula i le uafu tele i Apia, i se taumafaiga e tufa mai tomai o le fitafita o lea vaatau i gaioiga e faatino e faasagatau atu ai i le feavea’i faasolitulafono o fuālaau faasāina e faaaogā ai vaa o le sami.
O se a’oa’oga tāua mo leoleo o le tatou atunuu o i latou o loo faamalosia le tulafono ma feagai ma le māta’itūina o gaioiga solitulafono i le umia o nakoti poo fuālaau faasāina.
O le Aso Toonai na afea ai Samoa e lea manuao o le malo o Farani i le faamoemoe e lagolago i taumafaiga a aunuu o le Pasefika e taofia le avea ma nofoaga e faamautū ai gaioiga solitulafono e faasino i le feavea’i o fuālaau faasāina.
A o iai le manuao o le FNS Bouganville i Samoa e iai nisi o galuega fesoasoani o le a faatino e lona auvaa, a o le’i tuuvaa ese atu ma Samoa i le Aso Lua.
O loo faamautū lea vaatau o le malo o Farani i Papeete le laumua o Tahiti o se atunuu o le Pasefika o loo pulea faateritori e lea malo o le atu Europa.
