O le Aso Tofi o lenei vaiaso e fono ai le komiti o tuuga vaa mo le faamanatuina o le Tuto’atasi ma kapeteni o fautasi e 6 ua faamautū le auai i fā’agatama i le tai, ae ua faailoa e le ta’ita’ifono o lea komiti le afioga i le Sui Komesina o leoleo, o loo tatala pea le avanoa e faaulu atu ai ni vaa tulula ma paopao.
Ua faailoa ai foi e le ta’ita’ifono, o fautasi e lima mai Amerika Samoa o le a ese lava le latou tuuga e lē auai fautasi mai Samoa o loo alo i foe laupapa.
Peita’i o fautasi mai le tulaga muamua i le tulaga tolu o le tuuga a fautasi mai Tutuila ma Manu’a o le a latou sa’ili le siamupini ma fautasi e tolu mai Samoa o loo iai a latou foe sipuni e taualo ai ma Sa mai Amerika Samoa.
O le Aso Gafua le aso muamua o Iuni le tuuga fautasi mo vaa e 6 mai Samoa ae Aso Lua ai le aso 2 lea o Iuni le tuuga a fautasi e lima mai Tutuila ma Manu’a.
O le Aso Lulu le aso mulimuli o le Tuto’atasi e faia ai le sa’iliga siamupini e tutuu ai fautasi e 3 mai Samoa ma fautasi foi e tolu mai Tutuila ma Manu’a e faaaogā ai foe sipuni.
